محمد ين فطيس "الضيقه"

قصيدة الشاعر محمد بن فطيس المري
"الضيقه"
الضيقه اللـي دايمـا تالـي عصيـر
وش حيلتـي واردهــا لاتجيـنـي
لاطال ظل العود حزة عشـى الطيـر
كنها علـى سجـن الحديـد تحدينـي
يضيق صدري كل ماجـات واسيـر
ولايخفـف سـوج رجلـي حنيـنـي
لاحولنـا مشـراف ولااقـدر اطيـر
يـاالله قسـمـة خـيـر لاتبتليـنـي
وعقارب الساعه توقف عـن السيـر
ولكن في (الدوحه) سواتـي حزينـي
والعبره اللي تاصل الحلـق وتحيـر
ياقربها لو قيـل لـي (ياعوينـي)!!
امل شـوف النـاس ورد ومصاديـر
واللي يقول أش فيك؟ كنـه يهجينـي
يعني على ماقيل من بـاب تصويـر
(لاحدن أبي قربه ولاأحـدن يبينـي)
أروح أدور خـط مـابـه دواويــر
وادورالـلـي هـادهـا تهـديـنـي
واخذ مع الهاجـوس سجـه وتفكيـر
واراجع اللـي فـات بينـي وبينـي
واحسـب ذنـوبـي وادور لتكفـيـر
عسـاي ماقصـرت فـي والديـنـي
وعساي ماقارنت مـن ينفـخ الكيـر
واللي يحمل المسـك جعلـه قرينـي
ويطري علي يوم الحشر واطلب مجير
مااعطى كتابي فـي شقيقـة يمينـي
ويطري علي صدقان كثـر الدنانيـر
اللـي تعادينـي الـى كثـر ديـنـي
وراع الهروج اللي سـواة المناشيـر
أصـد عنـه وادري انـه يعنيـنـي
والى طرى لي واحدن كانـه صغيـر
أمـا أصغـر بيوميـن ولا سنيـنـي
دريت وش قومـي وعينـت تفسيـر
للضيقه اللـي مـن زمـن تعترينـي
حبه بصدري سالفة سـر فـي بيـر
وكـن الفـؤاد يقـول هـذا زبينـي
أشفق على علمن يجي منه من غيـر
مايسمع اللـي سولفـوا بـه ونينـي
العام أجيهم مـن حسـاب المساييـر
واليوم حـال عـداي وينـه ووينـي
ياكثرهم غيـره ولكـن خبـر خيـر
ماغير شوفه فـي الوجـود يهنينـي
رايـي كـذا ياعاشقيـن الغنـاديـر
ماله علـى وجـه البسيطـه وزينـي
خطاي تعليق الامـل فـي المدابيـر
اليـن راح وشفـت حقـري بعينـي
صبرن جميل وخابـر أنهـا مقاديـر
والله على تخفيـف حزنـي عوينـي
ذي حالتي لين تغبا الشمس واصيـر
معطى سراحي عقب ماانـا سجينـي
والى امتلا جوف الشجر بالعصافيـر
طلبـت مـن رب العبـاد يهديـنـي
يعتقني المذن عقـب ضيقـة عصيـر
اللي على سجـن الفـراق تحدينـي!