الشاعر خليل الشبرمي

الا ياقلم سر بالهواجيس سجل لي ** بيوت ٍ دفعها هيض فكري على بالي

هذا مطلع قصيده وجهها شاعر أسمه أحمد للشاعر خليل الشبرمي ، وهو من زملائه في الرياض ‘ والقصيده من 8 أبيات ، طلب منه أحمد أن يردعلى القصيدة ،وبعد أسبوع تقابل الشاعران ، فلمّح الشبرمي لزميله أن القصيدة تتكون من 8 أبيات لكنها ليست واحده ، الأربع أبيات الأولى تختلف عن الأربع التالية ، من حيث القوة والوزن ، لكن زميله أصر على الرد وبسرعة .

وهذا ليس هو المهم ، المهم هو أن قصيدة زميله أحمد تدور حول كلام الناس ، وان الناس لايسلم من ألسنتهم أحد .............................. والكلام هذا عا م1420 هـ

وهذا رد الشاعر خليل بن إبراهيم الشبرمي التميمي :





ألا مرحباً وا هـلاً هـلا عـدّ ماهلـي
سحابٍ على سلمى واجـا دوم همالـي
وحي الرفيق اللـي علومـه يجوزٍلـي
وحي الكتاب كتاب غالي ومـن غالـي
ولاوالله الا مرحبـاً بالرفيـق الـلـي
مضرا على كسب النواميـس ريبالـي
مديمٍ حجاجـه طلـق ولسانـه يهلـي
به الطيب طبع معـرب الجـد والخالـي
صديقٍ صدوقٍ صادق الود صـافٍ لـي
نقـيٍ تقـيٍ مـال اجنـاس وامثالـي
ومن بعد ذا يا احمد ابرسل وحوّل لـي
وشرواك ذيبٍ موجتـه تلقـط ارسالـي
وهات اذنك الله لايهينـك وقـرب لـي
ابهَمْس فيهـا بـس لايـدري الوالـي
انا يالحميدي راع وسمـي علـى بلـي
علام الوسوم اللي على بلّـك اشكالـي
وش اللي جرا ويش السبب يافتى قل لي
علام العلوم علـوم جـزلات وهزالـي
اليا صرت فوقي ما انت ملزوم تنزل لي
واليا صرت حدري مانت مكلوف ترقالي
وكانك تقـول النـاس قالـوا فدورلـي
من اللي سلم من راعي القيل والقالـي
وانا مثل غيري لاتضيق وتحسب لـي
قليليـن صدقانـي وياكثـر عـذالـي
فكم مـن حقودٍلانطحنـي تضحّـك لـي
وحقـده دفيـنٍ مالـه اول ولا تـالـي
وكم من مريضٍ مخرث القلـب ومغلـي
حقودٍ على كل البشـر للخـلا الخالـي
ولاتبعد ابدن بـس مـن ملّـك وملّـي
تحسـس ودور كـم حقـودٍ ومحتالـي
بلانـا بـلانـا بينـنـا دوم ينسـلـي
ومن بنا واشيـن وخسـاس وانذالـي
وبالناس يابن النـاس طامـن ومتعلـي
وانا ما ارفع الطامن ولااطمـن العالـي
ولاأبلي المستـور لا واستـر المبلـي
ولا اقول ياهليّـل وش يقـول هلالـي
ولااداني العيلـه ولاالميـل لـو ملـي
ولااطفـف لغيـري ولا ازيـد مكيالـي
وقلبي دليلـي يالحميـدي يدربـل لـي
اميز هماجه قبل اذوقـه مـن الحالـي
وكلـب الخرابـه لالبـد خلـه يولـي
ولا بيّن ابشر من يلزه علـى الجالـي
تهب الهبايب من شمـالٍ ومـن قبلـي
وملـق بمحلـه ماتحـرك ولا مـالـي
وزملٍ برك للشيـل مايشكـي الحملـي
ومن داس راس الداب ماهاب الاذيالـي
وانا احمد ربي ماخبـرت القـدم زلـي
ومشيي لك الله دوم دغـري وطوالـي
ودرب النشاما عنـه ماجنّبـت رجلـي
عفيفه شريفـه ماوطـت كـل بطّالـي
ونفسـي عزيـزه بالـردى ماتسوّلـي
وسود النوايا ماتشـوش علـى بالـي
وانا داري انك يافتى الجـود وافٍ لـي
ولاهي غريبـه منـك ياطيـب الفالـي
وعلى كل حالٍ جيت كلـي علـى حلـي
خذني شقيقٍ لك على كـل ابـو حالـي
ابلبس على ماتشتهيه انت فصّـل لـي
وضبّط عسـا الله مايعريـك تفصالـي
وانا اللي يبيني لو تعـدّى يعـوّد لـي
ومن لايببيني مايجي لـو هـو توالـي
وقل وا هني اللي عن النـاس متسلـي
دليـخٍ فضيـخٍ دالـهٍ خالـيٍ سـالـي
والا يالله انك يـا إلهـي تيسـر لـي
أموري وتنجيني من النـار والصالـي
وتستر عيوبي يا إلهـي وتغفـر لـي
ذنوبـي وزلاتـي وسيـات الاعمالـي
إلهي ولا لي غير عفـوك مـلاذٍ لـي
رحيـمٍ حليـمٍ خـالـقٍ رازقٍ والــي
وصلوا على سيْد البشـر عـدّ ماهلـي
سحابٍ على سلمى واجـا دوم همالـي